“الله يلعنها جيرة”

 

 

 

 مالي بالعادة أكتب بمدونتي عن شي تافه لهدرجه أو أكتب بالعامية بس الموضوع يقـــــــــــــــهر..

وما يحتاج أني انمق ركاكة اسلوبي عشان يوصلكم اللي بخاطري

يعني اليوم راح اجيبها ع بلاطة زي ما يقولو..

ولعل توصل لكم ويوصلكم شوي من اللي بقلبي

انتو شوفوا واحكموا …!!

 

بسلامة الحاضرين هذي جارتنا اللزقة الملقوفة الاستغلالية اللي بجد انا اكرهها بمعنى الكلمة..

ي جماعه محد فاهمها قدي… :,(

انا اعرفها والله ي ناس قوية وعلى ولا شيء يعني بس صوت عالي ونضرات وقلك يعني الإنسانة المثقفة المتزنة وهي ما عندها ما عند جدتي بس بالفه الناس بشكلها “شكل لا اكثر”

ولا هي حقت قيل وقال واستغفر الله اخلاق زفت والى مالا نهاية..

على العموم..

الهرجه هي ان الاخت  فلانه من الناس.. زارتنا بيوم

 

انا طبعاً كنت جايه من الجامعة ومرهقه..

يعني كَ العادة بطاقة الجامعة نضارتي ساعتي كلهم احطهم على كومدينتي قبل لا انام..

لأنهم أهم شيء احتاجوا بالجامعة..

الزبدة يومها شلفقة كل شيء عشان اشرد وانام قبل لا تمسكني ماما وتقولي اجلسي مع بنت الجارة

“وهنا الكارثة الأعظم..

مافيها شي احبو لا انا وولا انتو “صدقوني” ..فاكرين الاخت ام السعف والليف اللي ذكرتها أعلاه …

البنت هي عجينتها..حاصلها لا والعن …شي ما اعرف اوصوفو

حقيقي يصعب التعامل معاه ..هي من علم الشيطان..

ي انها سوسه وحقت لغوصة ومن تحت لتحت برضو نختصرها هي من الناس اللي يقفلو الستاير لو بدأوا

انتهى..

طبعا انا ي جماعه يومها ما اكلت شيء كلو عشان اروح انام او حتى اعمل نفسي نايمه..

وارتاح بعد الجامعة ومن العلة  ..

آ آ آ  ع  القهر بس ..

اللي صار أنو ماما دخلت قلك تصحيني عشان  اجلس معاها..”واختنا في الله دخلت معاها الغرفة “

انا مجرد ما سمعت نبرت ماما جايا بديت اجهز نفسي عشان اقولها ماما لاتدخلي احد وقفلي الباب وقولي اني

تعبانة وما فيني حيل اطلع “لاني عارفه بتسال عني”

شوي الا ..

دخلت الست هانم مع ماما طبعا وانا ما كان مني الا اسوي نفسي منتهيه وجالسه احلم..

اللي سار..

طبعا كلكم شفتو ساعتي اللي نزلتها ع الفيس..

جديدة ومالها كم يوم..

وقبل لا اقولكم ابغاكم تفهموا نقطه انو ليا شهور ابغى ساعه وماتوفر لي لا سعرها او حتى شي دخل مخي ..

الساعه ي جماعه جت بعد معـــــــــــاناة..

وطبعا كأي طالبة بعزوز الساعه تحكي وتتكلم وتجيب وتودي..يعني المقياس ع حسبها

كل ما كانت ساعتك كشخه وذوق وثقيله كل ما كان كل من حولك ثقيل<<وحباب ويساعد وفي الخدمة

على العموم..

دخلت ماما ووراها صوت الاخت الكريمة..

جلست ماما تصحي فيني.. وانا عايشه دور الغير قابلة للإستيقاظ..<<هنا انتهى فلم ماما فيني

بدأ الاكشن..لما حسيت شي انأخذ من جنبي..

واللي سوا لي ارتجاج هو كلمتها “الله ي خـــــــــــــاله..من اول واناا ادور ساعه برونز على لون  سوارفسكيا مدري ترتري مدري جهنمها<<لاتلوموني انا وقف مخي من لمن قالت الله

“فــــــــريز..

الله<<عند بنت جيراننا

يعني سارت لي بدون لا يردعني احد..

ما في مجال للنقاش يعني لو مين ما جاء بعد” الله “حقتها..

محد ح يقدر يفكها من اللي تبغاه

لا تقولو انا خميطه وهبله واستحي  بس من جد شي مستعصي

شي يقول لا بالله ..ماعليكي ح احافض.. وي بعيوني.. عييييييب سارت بايدي امينه… لا لا مستحيل ترديني

ي شيخه كلها شهرين وتنرد لك زي ماهيا.. ي ستي الدولتشي آند جبانا حقتي تفداكي وقفت ع…<<

يعني انتهى..

طبعا انا حتى لو قمت فركشت جو النوم اللي عايشتو ..ما ح يفيد

من اللحضه اللي قالت فيها الله عرفت انها راحت..

كل هالكلام صار لو شهر و 20 يوم..

يعني 50 يوم..

مع العلم انو ساعتي ما تهنيتها

وكانت من بابا..هديه

وكل ما أسال ماما تقولي ..معليش ايش قيمتها انا اجيب لك بعدها

بس تدرو..

والله وبدون مبالغه واللي بالجامعة يفهموا انا ايش اقصد

موضوع انو بطاقتك معاكي ونضارتك بعينك وساعتك بيدك

انتي كذا بالسليم

المصيبة انو جوالي ساعتو دائما مخرفة..

ومتعودة اخويا دائما يجيني من بوابة 420 ..

ولو ما عندي رصيد متفقين الساعه 12 اكون عند السايدات..

وانا دائما ماعندي لاني اشحن خدمتي   مرا بالشهر..

بختصار

انا مقهوره وتايهه بدون ساعتي..

يعني لا اعرف وقت..وولا اقدر ارجعها مع انها حقتتتتتتتتتي

وكل يوم الاخت اشوفها تلبسها وكل ما أسالها او اطلبها تقولي لسى الفرح

فرحنا بالرياض و حيكون بعد مدري كم

طيب انا ايش ذنبي..كل يوم والله يا بنات بيدها وهي لي<<ملكي انا

ما اابغاها ترجع لي زي ساعاتي الباقيه..

مندمره بسبتها

..حسيتو بقهري…

طيب لحضه..انتم ايش لكم..

او ايش استفدتم..

الحرمه اللي تأمر ومسويه قويه..

البنت اللي اخلاقها ولا شي وبكل بساطه تاخذ اغلى شي..

ما ذكرتكم بشي…!

طيب لحضه الـ 50 يوم اللي انا بحسرتي فيها مو قريبه من رقم..

او تدرو..

دائما يقولو الجامعه زي الدنيا..

وبطاقتها هويه..ولو ضيعناها البطاقة نجلس ساعه عند الباب نسوي تصريح دخول..

طيب..)

الهويه هي ديني..<<بطاقة الجامعة وخلينا نقول او نربطها بمكة..

لانو مكة شي كبير (الحرم) وهو هويتنا

النظارة ..هي راحتي من الشمس ..والبسها وقت ما تزيد الشمس علي

خلينا نقول انها.. شيء زي “المدينة..

حلوه وتخفف عليناالضغوط

طيب ثالث شي..وصلتو لو ولا لسى..

ايوا ساعتي .

.تايهه بدونها..

ما كان لي حيله وهي تنأخذ من قدامي

..غاليه علي..50 يوم او سنه..وراحت علي))

نعم ساعتي..او مغزاي “كان فلسطين..

خجلانين ..عشان انقهرتوا من بنت جيراني

طيب واسرائيل..مو ألعن من بنت جيراني ..او ما يتشابهو..

طيب خلونا نقول الصدق..بريطانيا وانتدابها…ما ذكرتكم بجارتي

امي …

انا….

كلنا..

عرب..و تخلينا عن ما عندنا ..بتظاهرنا كي ننعم بسكينة بها أنين عبرات

ماذا ننتظر..أكثر

ها هي إسرائيل “أكلت لحم ورمت لنا عظم..

نعم الشعب الفلسطيني في المخيمات كالعظام ..بقايا من مجتمع..

وليتنا نقدرهم أو نحنط هذه العظام كي تكون آخر رائحتنا بأرضنا..

فنحن لم نُخلص أرضهم ولم نرحم ضعفهم..

عباراتي وأن تبعثرت..

فلم أجد ما أبتدي به كي يُلملمها..

فقضيتي من الأساس تبدأ من المنتصف..)

اعلم أن ما كتبته لن يجعل قارئي يفز ويمسك سلاح ويحجز به على اقرب منطقه كي يقتحم بها ارضي المحتلة

كل ما بداخل إيمان بأن ابن الخامل الذي يقرأ كلماتي سوف يكون بيوم أنسان حقيقي خام يأخذ حقه..

إنسان لا يتجاهل.. لا يترك.. لا يتخلى .. لا يضطهد ..

ما اُريده هو ذلك الطفيف.. من الحموة أول القهر.. المكبوت..

ليس الكثير بل القليل

اُريد القليل منك يا صديقتي أختي وقريبتي..

ما اُريده هو الشعور بذلك الشيء الذي يسمونه “حق”

اُريد قهر نربي به ابنائنا ..كي يكبروا على مسؤوليتنا اتجاه حرمنا الثالث

نحن من تربينا على الشفاه ذات السحابات الكبيرة التي تُغلق افواهنا بأحكام..

طلبي أن نُربي جيل لا يتعرف أو يكتشف حقيقة اليهود من عشيقها/ـتها الممثل/هـ فلان /هـ ذو/ذات الديانة يهودية..

والتي من  خلاله/ـا نتعرف على اليهودية وماذا فعل ابنائها بنا..

(جيل ابائي من تكلم وتكلم وتلكم.. جيلي هوا من يُفكر ويُخطط..  أما عن من سيشفي الغليل فهو

جيل أبنائي فهوا من سيُنفــــــــــــــــــــــــــــــــــــــذ)

 

 

 

ملاحظة..

ترا لو ماقلت وسبيت وحشيت وجبتها ناشفه عن فلسطين محد قرأ..بس يا أخوات هدفي تشوفي الفرق..

وتثمني قهرك على ايش.

. جعلنا الله خلائف عائشة وفاطمة والخنساء..

جعلنا الله أمهات محرري فلسطين

فنحن من سيبني جنود التنفيذ..

Add to FacebookAdd to DiggAdd to Del.icio.usAdd to StumbleuponAdd to RedditAdd to BlinklistAdd to TwitterAdd to TechnoratiAdd to Yahoo BuzzAdd to Newsvine

Advertisements

رأيك يهم!!

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s